ਪੁਸਤਕ ਸਭਿਆਚਾਰ ਦਾ ਕੋਈ ਵੀ ਤੋੜ ਨਹੀਂ : ਡਾ ਰਵਿੰਦਰ
ਅੰਮ੍ਰਿਤਸਰ, 17 ਅਪ੍ਰੈਲ (ਬੁਲੰਦ ਆਵਾਜ ਬਿਊਰੋ):-ਅੱਖਰ ਸਾਹਿਤ ਅਕਾਦਮੀ ਵੱਲੋਂ ਅੱਖਰ ਦੇ ਨਵੇਂ ਅੰਕ ਦੇ ਨਾਲ ਡਾ ਕਰਨੈਲ ਸ਼ੇਰਗਿੱਲ ਦੋ ਕਹਾਣੀ ਸਗ੍ਰਹਿ ਅਤੇ ਉਨ੍ਹਾਂ ਦੀ ਬੇਟੀ ਕਰੀਨਾ ਏ ਸ਼ੇਰ ਦਾ ਕਾਵਿ ਸਗ੍ਰਹਿ ” ਕਾਦਿਰ ਟੂ ਜੈਨਿਥ ” ਰਿਲੀਜ਼ ਕੀਤਾ ਗਿਆ । ਪਿਤਾ ਦੇ ਦੋ ਕਹਾਣੀ ਸਗ੍ਰਹਿ ਅਤੇ ਧੀ ਦੇ ਕਾਵਿ ਸਗ੍ਰਹਿ ਦੀ ਘੁੰਡ ਚੁਕਾਈ ਸਮੇਂ ਅੰਮ੍ਰਿਤਸਰ ਦੇ ਬਹੁਤ ਲੇਖਕ ਅਤੇ ਉਨ੍ਹਾਂ ਦੇ ਪਰਿਵਾਰ ਦੇ ਮੈਂਬਰ ਹਾਜ਼ਿਰ ਸਨ । ਸ਼ੇਰਗਿਲ ਪਰਿਵਾਰ ਨੂੰ ਵਿਦੇਸ਼ਾਂ ਵਿਚ ਜਾ ਕੇ ਵੀ ਸਾਹਿਤ ਅਤੇ ਪੰਜਾਬ ਦੀ ਮਿੱਟੀ ਨਾਲ ਜੁੜੇ ਰਹਿਣ ਅਤੇ ਉਸਾਰੂ ਸਾਹਿਤ ਰਾਹੀਂ ਪੰਜਾਬੀ ਭਾਸ਼ਾ ਦਾ ਪ੍ਰਚਾਰ ਅਤੇ ਪ੍ਰਸਾਰ ਕਰਨ ਦੀ ਵਧਾਈ ਦਿੱਤੀ ਗਈ। ਪੰਜਾਬੀ ਦੇ ਉੱਘੇ ਸ਼ਾਇਰ ਡਾ.ਰਾਵਿੰਦਰ ਨੇ ਸ਼ੇਰਗਿਲ ਪਰਿਵਾਰ ਨਾਲ ਆਪਣੀਆਂ ਗੁੂੜ੍ਹੀਆਂ ਸਾਂਝਾ ਨੂੰ ਜਿੱਥੇ ਤਾਜ਼ਾ ਕੀਤਾ ਉੱਥੇ ਪੰਜਾਬੀ ਸਾਹਿਤ ਦੇ ਭਵਿੱਖ ਦੀ ਗੱਲ ਕਰਦਿਆਂ ਕਿਹਾ ਕਿ ਇਸ ਸਮੇਂ ਸਾਹਿਤ ਦੀਆਂ ਵੱਖ-ਵੱਖ ਵਿਧਾਵਾਂ ਨੂੰ ਸੋਸ਼ਲ ਮੀਡੀਆ ਵੱਲੋਂ ਢਾਹ ਲਾਏ ਜਾਣ ਦੇ ਬਾਵਜੂਦ ਪੁਸਤਕ ਸਭਿਆਚਾਰ ਦਾ ਕੋਈ ਵੀ ਸਾਨੀ ਨਹੀਂ ਹੈ। ਉਨ੍ਹਾਂ ਕਿਹਾ ਕਿ ਇਹ ਸਿੱਧ ਹੋ ਚੁੱਕਾ ਹੈ ਕਿ ਉਹ ਸ਼ਬਦ ਹੀ ਤੁਹਾਡੀ ਜ਼ਿੰਦਗੀ ਵਿਚ ਅਰਥ ਭਰਪੂਰ ਤਬਦੀਲੀ ਲਿਆ ਸਕਦੈ ਜੋ ਤੁਸੀਂ ਕਿਤਾਬ ਵਿੱਚੋਂ ਗ੍ਰਹਿਣ ਕਰਦੇ ਹੋ। ਇਹ ਭਾਵਨਾਤਮਕ ਤੌਰ ਤੇ ਤੁਹਾਡੇ ਤੇ ਪ੍ਰਭਾਵ ਛੱਡਦੇ ਹਨ ਵਿਜ਼ੂਅਲ ਥੋੜ੍ਹ-ਚਿਰਾ ਹੈ ਤੁਹਾਡੇ ਦਿਮਾਗ ‘ਤੇ ਚਿਰਾਂ ਤਕ ਪ੍ਰਭਾਵ ਨਹੀਂ ਛੱਡ ਸਕਦਾ । ਉਨ੍ਹਾਂ ਲੇਖਕਾਂ ਨੂੰ ਕਿਹਾ ਕਿ ਉਹ ਪੁਸਤਕ ਸਭਿਆਚਾਰ ਨੂੰ ਉਤਸ਼ਾਹਿਤ ਕਰਨ ਦਾ ਸਿਲਸਿਲਾ ਇੰਝ ਹੀ ਜਾਰੀ ਰੱਖਣ ।ਉਨ੍ਹਾਂ ਕਿਹਾ ਸਾਇੰਸ ਦੀਆਂ ਅਧੁਨਿਕ ਕਾਢਾਂ ਨੇ ਮਨੁੱਖੀ ਜੀਵਨ ਵਿਚ ਵੱਡੀਆਂ ਤਬਦੀਲੀਆਂ ਲਿਆਂਦੀਆਂ ਹਨ, ਉਨ੍ਹਾਂ ਤੋਂ ਮੁਨਕਰ ਨਹੀਂ ਹੋਇਆ ਜਾ ਸਕਦਾ। ਉਹ ਅੱਖਰ ਸਾਹਿਤ ਅਕਾਦਮੀ ਦੇ ਇੱਕ ਸਮਾਗਮ ਵਿਚ ਪ੍ਰਧਾਨਗੀ ਭਾਸ਼ਣ ਦੇ ਰਹੇ ਸਨ । ਇਸ ਮੌਕੇ ਜਿੱਥੇ ਦੋ ਕਹਾਣੀ ਸਗ੍ਰਹਿ, ਇੱਕ ਕਵਿ ਸਗ੍ਰਹਿ ਅਤੇ ਸਾਹਿਤਕ ਮੈਗਜ਼ੀਨ “ਅੱਖਰ” ਦਾ ਮਈ,ਜੂਨ,ਜੁਲਾਈ 2024 ਦਾ ਅੰਕ ਰਿਲੀਜ਼ ਕੀਤਾ ਗਿਆ ਉੱਥੇ ਬਲਵਿੰਦਰ ਸੰਧਾ ਦਾ ਜਨਮ ਦਿਨ ਵੀ ਸਾਰੇ ਲੇਖਕਾਂ ਨੇ ਕੇਕ ਕੱਟ ਕੇ ਮਨਾਇਆ । ਇਸ ਸਮਾਗਮ ਦੀ ਖੂਬਸੂਰਤੀ ਇਹ ਰਹੀ ਕਿ ਇਸ ਵਿਚ ਜਿੱਥੇ ਡਾ ਕਰਨੈਲ ਸ਼ੇਰਗਿਲ ਦੇ ਦੋ ਕਹਾਣੀ ਸਗ੍ਰਹਿ “ਮੈਮੋਰੀ ਲੇਨ”, “ਪੰਦਰ੍ਹਵਾ਼ ਲਾਲ ਕਰਾਸ” ਉਨ੍ਹਾਂ ਦੀ ਬੇਟੀ ਦਾ ਕਾਵਿ ਸਗ੍ਰਹਿ ” ਨਾਦਿਰ ਟੂ ਜੇਰਿਥ”ਜੋ ਪ੍ਰਧਾਨਗੀ ਮੰਡਲ ਵੱਲੋਂ ਰਿਲੀਜ਼ ਕੀਤੇ ਗਏ ਅਤੇ ਉਨ੍ਹਾਂ ‘ਤੇ ਹਾਜ਼ਿਰ ਵਿਦਵਾਨਾਂ ਵੱਲੋਂ ਨਿੱਠ ਕੇ ਗੱਲ ਵੀ ਕੀਤੀ ਗਈ ਉੱਥੇ ਵਿਦਵਾਨਾਂ ਸਾਹਿਤ ਦੇ ਸਦੰਰਭ ਵਿਚ ਬਹੁਤ ਸਾਰੇ ਸਵਾਲ ਵੀ ਉਠਾਏ ਗਏ ਕਿ ਅਸਲ ਸਾਹਿਤ ਦਿਨੋ-ਦਿਨ ਲੋਕਾਂ ਤੋਂ ਦੂਰ ਹੋ ਰਿਹਾ ਹੈ ਅਤੇ ਊਲ-ਜਲੂਲ ਤਰ੍ਹਾਂ ਦੇ ਸਾਹਿਤ ਨੂੰ ਸੋਸ਼ਲ ਮੀਡੀਆ ਪ੍ਰਚਾਰਿਆ ਜਾ ਰਿਹਾ । ਜਿਸ ਦੇ ਕਾਰਨ ਨੈਤਿਕ-ਕਦਰਾਂ ਕੀਮਤਾਂ ਤੋਂ ਵਿਹੂਣਾ ਸਾਡਾ ਸਮਾਜ ਖਾਲੀ ਪੀਪੇ ਦੀ ਤਰ੍ਹਾਂ ਹੋ ਰਿਹਾ ਹੈ । ਉੱਘੀ ਆਰਟਿਸਟ ਮਨਦੀਪ ਘਈ ਵੱਲੋਂ ਉਠਾਏ ਸਵਾਲ ਕਿ ਲੇਖਕ ਆਪਣੀਆਂ ਰਚਨਾਵਾਂ ਨੂੰ ਲੈ ਕੇ ਕਿੱਥੋਂ ਜਾਵੇ ਜਦੋਂ ਕਿ ਨਵੀਂ ਪੀੜ੍ਹੀ ਕਿਤਾਬਾਂ ਤੋਂ ਦਿਨੋ-ਦਿਨ ਦੂਰੀ ਬਣਾ ਰਹੀ ਹੈ ਅਤੇ ਉਹ ਆਪਣੇ ਮੋਬਾਇਲ ਵਿਚ ਗੁੰਮ-ਗੁਆਚ ਰਹੀ ਹੈ । ਉੱਘੇ ਆਈ.ਟੀ ਨਿਰਦੇਸ਼ਕ ਸਤਪਾਲ ਸਿੰਘ ਸੋਖੀ ਨੇ ਕਿਹਾ ਕਿ ਲੇਖਕਾਂ ਨੂੰ ਨਿਰਾਸ਼ ਨਹੀਂ ਹੋਣਾ ਚਾਹੀਦਾ । ਲੇਖਕ ਹੀ ਸਮਾਜ ਦੀ ਅਸਲ ਅਗਵਾਈ ਕਰਦੇ ਹਨ ਅਤੇ ਬਿਨਾਂ ਕਿਸੇ ਦੇ ਦਬਾਅ ਹੇਠ ਸਮਾਜ ਦਾ ਸ਼ੀਸ਼ਾ ਵਿਖਾਉਣ ਦਾ ਕੰਮ ਕਰਦੇ ਹਨ। ਉਨ੍ਹਾਂ ਇਸ ਗੱਲ ‘ਤੇ ਜ਼ੋਰ ਦਿੱਤਾ ਕਿ ਕਿਤਾਬਾਂ ਦੇ ਨਾਲ-ਨਾਲ ਜੋ ਅਧੁਨਿਕ ਸੰਚਾਰ ਦੇ ਸਾਧਨ ਹਨ ਨੂੰ ਵੀ ਉਹ ਅਪਣਾਉਣ ਤਾਂ ਜੋ ਗਲਤ-ਮਲਤ ਸਾਡੇ ਬੱਚਿਆਂ ਤੇ ਮੰਡੀ ਵੱਲੋਂ ਥੋਪਿਆ ਜਾ ਰਿਹਾ ‘ਤੇ ਰੋਕ ਲੱਗ ਸਕੇ । ਇਸ ਮੌਕੇ ਡਾ ਹੀਰਾ ਸਿੰਘ ਨੇ ਸਾਹਿਤ ਦੇ ਇਤਿਹਾਸਕ ਪਹਿਲੂਆਂ ਨਾਲ ਦੱਸਿਆ ਕਿ ਸਮਾਜ ਚ ਕ੍ਰਾਂਤੀ ਲਿਆਉਣ ਦਾ ਕੰਮ ਹਮੇਸ਼ਾ ਸਾਹਿਤ ਨੇ ਹੀ ਕੀਤਾ ਹੈ ਪਰ ਮੌਜੂਦਾ ਸਮੇਂ ਦੇ ਸਾਹਿਤ ਵਿਚ ਪਾਠਕਾਂ ਅਤੇ ਲੇਖਕਾਂ ਦਾ ਜੋ ਪਾੜਾ ਵੱਧ ਰਿਹਾ ਹੈ ਚਿੰਤਾ ਪੈਦਾ ਕਰਨ ਵਾਲਾ ਹੈ । ਉਨ੍ਹਾਂ ਕਿਹਾ ਜਾ ਤਾਂ ਅੱਜ ਪਾਠਕਾਂ ਦੀ ਮਾਨਸਿਕਤਾ ਅਨੁਸਾਰ ਲੇਖਕ ਲਿਖ ਨਹੀਂ ਰਹੇ ਜਾ ਪਾਠਕਾਂ ਦਾ ਲੇਖਕਾਂ ਤੋਂ ਮੋਹ ਭੰਗ ਹੋ ਗਿਆ ਹੈ । ਉਨ੍ਹਾਂ ਕਿਹਾ ਸਮੇਂ ਦੀ ਮੰਗ ਹੈ ਕਿ ਅਧੁਨਿਕ ਸਮਾਜ ਜਿਸ ਵਿਚ ਵੱਡੇ ਪੱਧਰ ‘ਤੇ ਤਬਦੀਲੀਆਂ ਵਾਪਰ ਰਹੀਆਂ ਹਨ ਨੂੰ ਸਮਝ ਕੇ ਹੀ ਸਮਾਜ ਨੂੰ ਸਹੀ ਸੇਧ ਦਿੱਤੀ ਜਾ ਸਕਦੀ ਹੈ । ਉਨ੍ਹਾਂ ਕਿਹਾ ਕਿ ਸੋਸਲ ਮੀਡੀਆ ਦੇ ਸਾਇਡ ਇਫੈਕਟ ਸਮਾਜ ਲਈ ਬਹੁਤ ਘਾਤਕ ਸਿੱਧ ਹੋਣਗੇ ਅਤੇ ਲੰਬੇ ਸਮੇਂ ਤਕ ਇਸ ਖਮਿਆਜ਼ਾ ਸਾਨੂੰ ਭੁਗਤਣਾ ਪਵੇਗਾ। ਉਨ੍ਹਾਂ ਡਾ ਕਰਨੈਲ ਸ਼ੇਰਗਿੱਲ ਅਤੇ ਅੱਖਰ ਸਾਹਿਤ ਅਕਾਦਮੀ ਨੂੰ ਭਾਵਪੂਰਤ ਅਤੇ ਸੰਜੀਦਗੀ ਭਰਿਆ ਸਾਹਿਤਕ ਸੰਵਾਦ ਰਚਾਉਣ ਦੀ ਮੁਬਾਰਕਾਂ ਦਿੱਤੀ ਅਤੇ ਇਹ ਵੀ ਕਿਹਾ ਕਿ ਉਹ ਇਹ ਸਿਲਸਿਲਾ ਇੰਝ ਹੀ ਜਾਰੀ ਰੱਖਣ । ਇਸ ਦੇ ਆਉਣ ਵਾਲੇ ਸਮੇਂ ਵਿਚ ਚੰਗੇ ਨਤੀਜੇ ਮਿਲਣਗੇ । ਕਹਾਣੀਕਾਰਾ ਡਾ.ਸਰਘੀ ਨੇ ਇਸ ਮੌਕੇ ਜਿੱਥੇ ਡਾ ਕਰਨੈਲ ਸ਼ੇਰਗਿਲ ਦੇ ਦੋਵਾਂ ਕਹਾਣੀ ਸਗ੍ਰਹਿਾਂ ਨੂੰ ਪੰਜਾਬੀ ਕਹਾਣੀ ਦੀ ਵਿਧਾ ਵਿਚ ਵਿਸ਼ੇ ਪੱਖੋਂ ਨਵੀਆਂ ਕਹਾਣੀਆਂ ਦੀ ਆਮਦ ਦੱਸਿਆ ਉੱਥੇ ਉਨ੍ਹਾਂ ਕਰੀਨਾ ਸ਼ੇਰ ਦੇ ਅੰਗਰੇਜ਼ੀ ਭਾਸ਼ਾ ਵਿਚ ਕਾਵਿ ਸਗ੍ਰਹਿ “ਨਾਦਿਰ ਟੂ ਜੈਰਿਥ ” ਦਾ ਸਵਾਗਤ ਕਰਦਿਆਂ ਕਿਹਾ ਕਿ ਉਨ੍ਹਾਂ ਨੂੰ ਉਨ੍ਹਾਂ ਦੀ ਧੀ ਦੇ ਕਾਵਿ ਸਗ੍ਰਹਿ ਲਈ ਮੁਬਾਰਕਾਂ । ਉਨ੍ਹਾਂ ਕਿਹਾ ਕਿ ਇਸ ਕਾਵਿ ਸਗ੍ਰਹਿ ਨਾਲ ਪੰਜਾਬੀਆਂ ਦਾ ਹੀ ਮਾਣ ਵਧਿਆ ਹੈ । ਅੱਜ ਦੇ ਪੰਜਾਬੀ ਵਿਸ਼ਵ ਪੱਧਰ ਦੀ ਕਾਵਿ ਰਚਨਾ ਕਰਨ ਦੇ ਸਮਰੱਥ ਹੋ ਰਹੇ ਹਨ ਉਨ੍ਹਾਂ ਕਿਹਾ ਕਿ ਇਸ ਦੀ ਜਾਗ ਉਨ੍ਹਾਂ ਨੂੰ ਆਪਣੇ ਪਿਤਾ ਤੋਂ ਲੱਗੀ। ਉਨ੍ਹਾਂ ਨੂੰ ਗੁੜਤੀ ਪੰਜਾਬੀ ਕਵਿਤਾ ਦੀ ਮਿਲੀ ਸੀ ।ਜਿਸ ਕਰਕੇ ਉਹ ਬਹੁਤ ਪਿਆਰੀਆਂ ਕਵਿਤਾਵਾਂ ਦੇ ਕਾਵਿ ਸਗ੍ਰਹਿ ਪਾਠਕਾਂ ਦੀ ਨਜ਼ਰ ਕਰ ਸਕੇ ਹਨ । ਇਸ ਤੋਂ ਪਹਿਲਾਂ ਡਾ ਕਰਨੈਲ ਸ਼ੇਰਗਿਲ ਨੇ ਆਪਣੀ ਸਿਰਜਣ ਪ੍ਰਕਿਰਿਆ ਤੇ ਚਾਨਣਾ ਪਾਇਆ ਅਤੇ ਦੱਸਿਆ ਕਿ ਉਹ ਹੁਣ ਤਕ ਕਿਵੇਂ ਡਾਕਟਰੀ ਰੁਝੇਵੇਂ ਵਿੱਚੋਂ ਸਮਾਂ ਕੱਢ ਕੇ ਪੰਜਾਬੀ ਮਾਂ ਬੋਲੀ ਦੀ ਸੇਵਾ ਵਿਚ ਕਿਤਾਬਾਂ ਪਾ ਸਕੇ ਹਨ । ਨਾਵਲ ਲਾਕਡਾਉਨ ਅਲਫਾ ਅਤੇ ਲਾਕਡਾਉਨ ਇੰਫਿਨਟੀ ਜੋ ਦੂਸਰੀਆਂ ਭਾਸ਼ਾਵਾਂ ਵਿਚ ਅਨੁਵਾਦ ਹੋ ਰਹੇ ਤੋਂ ਇਲਾਵਾ ਉਨ੍ਹਾਂ ਦੀ ਇੱਕ ਕਹਾਣੀ ਜੋ ਪੰਜਾਬੀ ਦੀਆਂ ਸਰਵੋਤਮ ਕਹਾਣੀਆਂ ਵਿੱਚੋਂ ਇੱਕ ਪੰਦਰ੍ਹਵਾਂ ਲਾਲ ਕਰਾਸ ਦਾ 14 ਭਾਸ਼ਾਵਾਂ ਵਿਚ ਅਨੁਵਾਦ ਹੋਇਆ ਹੈ ਤੋਂ ਬਾਅਦ ਉਨ੍ਹਾਂ ਨੂੰ ਪੰਜਾਬੀ ਵਿਚ ਲਿਖਣ ਤੇ ਮਾਣ ਹੋਇਆ ਹੈ । ਉਨ੍ਹਾਂ ਕਿਹਾ ਪੰਜਾਬੀ ਵਿਚ ਲਿਖੇ ਜਾ ਰਹੇ ਚੰਗੇ ਸਾਹਿਤ ਦੀ ਕੋਈ ਕਮੀ ਨਹੀਂ। ਪੰਜਾਬੀ ਅਮੀਰ ਭਾਸ਼ਾਵਾਂ ਵਿਚ ਆਉਂਦੀ ਹੈ। ਡਾ ਵਿਕਰਮ ਸ਼ੇਰਗਿਲ ਨੇ ਡਾ ਕਰਨੈਲ ਸ਼ੇਰਗਿਲ ਦੀਆਂ ਸਾਹਿਤਕ ਰਚਨਾਵਾਂ ਅਤੇ ਉਨ੍ਹਾਂ ਦੇ ਜੀਵਨ ਦੀਆਂ ਪ੍ਰਮੁੱਖ ਘਟਨਾਵਾਂ ਦਾ ਜਿਕਰ ਕਰਕੇ ਅੱਖਰ ਸਾਹਿਤ ਅਕਾਦਮੀ ਦੇ ਇਸ ਸਾਹਿਤਕ ਸਮਾਗਮ ਦੀ ਚਰਚਾ ਨੂੰ ਅੱਗੇ ਤੋਰਿਆ ਜਦੋਂਕਿ ਕਿ ਅੱਖਰ ਦੇ ਸੰਪਾਦਕ ਅਤੇ ਸ਼ਾਇਰ ਵਿਸ਼ਾਲ ਨੇ ਆਪਣੀ ਵਿਧਵਤਾ ਨਾਲ ਪੂਰੇ ਸਮਾਗਮ ਨੂੰ ਕਰੀਬ ਦੋ ਘੰਟੇ ਤਕ ਦੇਰ ਸ਼ਾਮ ਤਕ ਚੱਲਿਆ ਨੂੰ ਵਿਧੀਵਧ ਢੰਗ ਨਾਲ ਕਰਕੇ ਸਿਖਰਾਂ ਤੇ ਪਹੁੰਚਾਇਆ ਗਿਆ । ਰੰਗੀਨ ਸਾਹਿਤਕ ਸ਼ਾਮ ਵਿਚ ਉਸਾਰੂ ਸਾਹਿਤਕ ਸੰਵਾਦ ਰਚਾਉਣ ਵਾਲੇ ਵਿਦਵਾਨਾਂ ਦਾ ਨਿੱਘਾ ਸਵਾਗਤ ਹਿੰਦੀ ਅਤੇ ਪੰਜਾਬੀ ਦੇ ਪ੍ਰਸਿੱਧ ਕਵੀ ਅਤੇ ਅੱਖਰ ਸਾਹਿਤ ਅਕਾਦਮੀ ਦੇ ਪ੍ਰਧਾਨ ਇੰਦਰੇਸ਼ਮੀਤ ਨੇ ਕੀਤਾ ਅਤੇ ਇਸ ਗੱਲ ਦਾ ਭਰੋਸਾ ਦਵਾਇਆ ਕਿ ਇਹੋ ਅਜਿਹੇ ਉਸਾਰੂ ਸਾਹਿਤਕ ਸੰਵਾਦ ਦਾ ਸਿਲਸਿਲਾ ਜਾਰੀ੍ ਰੱਖਿਆ ਜਾਵੇਗਾ । ਇਸ ਮੌਕੇ ਜਿੰਨ੍ਹਾਂ ਸਾਹਿਤਕ ਪ੍ਰੇਮੀਆਂ ਵੱਲੋਂ ਹਾਜ਼ਰੀ ਭਰੀ ਗਈ ਉਨ੍ਹਾਂ ਵਿਚ ਗੁਰੂ ਨਾਨਕ ਦੇਵ ਯੂਨੀਵਰਸਿਟੀ ਤੋਂ ਪ੍ਰਵੀਨ ਪੁਰੀ, ਡਾ ਅਵਤਾਰ ਸਿੰਘ ਪੱਡਾ, ਡਾ ਅਵਤਾਰ ਸਿੰਘ ਧੰਜੂ , ਪੂਰਨ ਪਿਆਸਾ, ਡਾ.ਭੁਪਿੰਦਰ ਪੱਡਾ,ਡਾ ਬਲਜੀਤ ਢਿੱਲੋਂ ,ਡਾ ਮੀਨਾਕਸ਼ੀ ਸ਼ੇਰਗਿੱਲ , ਡਾ. ਮਨਿੰਦਰ ਸ਼ੇਰਗਿੱਲ,ਦਵਿੰਦਰ , ਡਾ.ਬੇਅੰਤ ਸਿੰਘ , ਕਵਲਜੀਤ ਮਜੀਠਾ,ਡਾ. ਕਿਰਨਦੀਪ ਸ਼ਾਮਿਲ ਸਨ ।
