ਮਹਾਰਾਸ਼ਟਰ, 22 ਮਈ (ਬੁਲੰਦ ਆਵਾਜ ਬਿਊਰੋ):-ਮਹਾਰਾਸ਼ਟਰ ਦੇ ਨਾਗਪੁਰ ਵਿਚ ਮਮਤਾ ਸ਼ਰਮਸਾਰ ਹੋਈ ਹੈ। ਇਥੇ ਇਕ ਮਾਂ ਨੇ ਆਪਣੀ 3 ਸਾਲ ਦੀ ਧੀ ਦਾ ਬੇਰਹਿਮੀ ਨਾਲ ਕਤਲ ਕਰ ਦਿਤਾ। ਕਲਯੁਗੀ ਮਾਂ ਲਾਸ਼ ਨੂੰ ਲੈ ਕੇ 4 ਕਿਲੋਮੀਟਰ ਤੱਕ ਭਟਕਦੀ ਰਹੀ ਅਤੇ ਫਿਰ ਪੁਲਿਸ ਦੇ ਸਾਹਮਣੇ ਆਤਮ ਸਮਰਪਣ ਕਰ ਦਿਤਾ। ਪੁਲਿਸ ਨੇ ਦੱਸਿਆ ਕਿ ਔਰਤ ਦਾ ਆਪਣੇ ਪਤੀ ਨਾਲ ਝਗੜਾ ਹੋਇਆ ਸੀ।ਇਹ ਘਟਨਾ 20 ਮਈ ਦੀ ਹੈ, ਜਦੋ ਗੁੱਸੇ ‘ਚ ਆ ਕੇ ਔਰਤ ਨੇ ਆਪਣੀ ਧੀ ਦਾ ਗਲਾ ਘੁੱਟ ਦਿੱਤਾ। ਪੁਲਿਸ ਨੇ ਦੱਸਿਆ ਕਿ ਦੋਸ਼ੀ ਔਰਤ ਦਾ ਨਾਂ ਟਵਿੰਕਲ ਰਾਉਤ (23 ਸਾਲ) ਹੈ। ਉਹ 4 ਸਾਲ ਪਹਿਲਾਂ ਆਪਣੇ ਪਤੀ ਰਾਮਾ ਲਕਸ਼ਮਣ ਰਾਊਤ (24 ਸਾਲ) ਨਾਲ ਨਾਗਪੁਰ ਆਈ ਸੀ। ਦੋਵੇਂ ਇੱਥੇ ਕੰਮ ਕਰਨ ਆਏ ਸਨ ਅਤੇ ਦੋਵੇਂ ਐੱਮ.ਆਈ.ਡੀ.ਸੀ. ਇਲਾਕੇ ‘ਚ ਸਥਿਤ ਇਕ ਪੇਪਰ ਪ੍ਰੋਡਕਟ ਕੰਪਨੀ ‘ਚ ਕੰਮ ਕਰਦੇ ਸਨ। ਇਥੇ ਉਹ ਕੰਪਨੀ ਕੰਪਲੈਕਸ ਵਿਚ ਹੀ ਇਕ ਕਮਰੇ ਵਿਚ ਰਹਿੰਦੇ ਸਨ। ਦੋਵਾਂ ਵਿਚਕਾਰ ਕਈ ਲੜਾਈਆਂ ਹੋਈਆਂ। ਸੋਮਵਾਰ (20 ਮਈ) ਨੂੰ ਸ਼ਾਮ 4 ਵਜੇ ਟਵਿੰਕਲ ਅਤੇ ਰਾਮਾ ਦੀ ਲੜਾਈ ਹੋਈ ਸੀ। ਇਸ ਦੌਰਾਨ ਉਸ ਦੀ 3 ਸਾਲ ਦੀ ਬੇਟੀ ਰੋਣ ਲੱਗੀ। ਗੁੱਸੇ ‘ਚ ਆ ਕੇ ਟਵਿੰਕਲ ਨੇ ਲੜਕੀ ਨੂੰ ਘਰੋਂ ਬਾਹਰ ਕੱਢ ਦਿੱਤਾ। ਇਸ ਤੋਂ ਬਾਅਦ ਉਸ ਨੂੰ ਦਰੱਖਤ ਹੇਠਾਂ ਲਿਜਾ ਕੇ ਗਲਾ ਘੁੱਟ ਦਿੱਤਾ ਗਿਆ। ਲੜਕੀ ਦਾ ਕਤਲ ਕਰਨ ਤੋਂ ਬਾਅਦ ਔਰਤ ਲਾਸ਼ ਲੈ ਕੇ 4 ਕਿਲੋਮੀਟਰ ਤੱਕ ਭਟਕਦੀ ਰਹੀ। ਰਾਤ ਕਰੀਬ 8 ਵਜੇ ਉਸ ਨੇ ਪੁਲਿਸ ਦੀ ਕਾਰ ਦੇਖੀ। ਉਸ ਨੇ ਪੁਲਿਸ ਨੂੰ ਪਹੁੰਚ ਕੇ ਸਾਰੀ ਘਟਨਾ ਦੀ ਜਾਣਕਾਰੀ ਦਿੱਤੀ। ਪੁਲਿਸ ਤੁਰੰਤ ਲੜਕੀ ਨੂੰ ਹਸਪਤਾਲ ਲੈ ਗਈ, ਜਿੱਥੇ ਡਾਕਟਰ ਨੇ ਉਸ ਨੂੰ ਮ੍ਰਿਤਕ ਐਲਾਨ ਦਿੱਤਾ। ਪੁਲਿਸ ਨੇ ਔਰਤ ਨੂੰ ਗ੍ਰਿਫਤਾਰ ਕਰ ਲਿਆ। ਉਸ ‘ਤੇ ਆਈਪੀਸੀ ਦੀ ਧਾਰਾ 302 ਤਹਿਤ ਕਤਲ ਦੇ ਦੋਸ਼ ਲਾਏ ਗਏ ਹਨ। ਉਸ ਨੂੰ ਅਦਾਲਤ ਵਿਚ ਪੇਸ਼ ਕੀਤਾ ਗਿਆ। ਫਿਲਹਾਲ ਅਦਾਲਤ ਨੇ ਮਹਿਲਾ ਨੂੰ 24 ਮਈ ਤੱਕ ਪੁਲਿਸ ਰਿਮਾਂਡ ‘ਤੇ ਭੇਜ ਦਿੱਤਾ ਹੈ।